نیوز کانفرنس میں آصف علی زرداری نے کہا کہ اب بہت ہو چکا۔  اب شہباز شریف مستعفی ہوں اور عدالت کا سامنا کریں۔ سابق صدر نے کہا کہ وہ طاہر القادری کے ساتھ مل کر لڑیں گے اور سڑکوں پر نکلیں گے۔

مسلم لیگ ن کے خلاف آصف علی زرداری اور ڈاکٹر طاہر القادری کا اتحاد

پاکستان پیپلز پارٹی کے شریک چئیرمین اور سابق صدر آصف علی زرداری نے لاهور کے علاقے ماڈل ٹاؤن میں منہاج القرآن کے سیکریٹریٹ میں پاکستان عوامی تحریک کے سربراہ ڈاکٹر طاہرالقادری سے ملاقات کی۔ ملاقات میں یروشلم کو اسرائیل کا دارالحکومت بنائے جانے، ملکی سیاسی صورت حال اور جسٹس باقر نجفی رپورٹ پر ایک گھنٹے سے زیادہ دیر تک بات چیت ہوئی۔

دونوں راہنماؤں کے درمیان پہلی ملاقات وفود کے ساتھ جب کہ بعد ایک اور ملاقات ون آن ون ملاقات ہوئی۔

ملاقات کے بعد مشترکہ پریس کانفرنس کرتے ہوئے ڈاکٹر طاہرالقادری نے کہا کہ یروشلم کے لیے 70 سال سے لوگوں نے قربانیاں دی ہیں۔ امریکہ سے امت مسلمہ امید کرتی تھی کہ وہ قیام امن کے لیے اقدام اٹھائے۔

ٹرمپ اپنے فیصلے پر نظر ثانی کریں، مسلمان بہت مایوس ہوئے ہیں۔ آج کا فیصلہ مشکلات پیدا کرے گا، امن خراب ہو گا اور دہشت گردی بڑھے گی۔

ڈاکٹر طاہرالقادری نے کہا کہ ماڈل ٹاؤن کا آپریشن رکاوٹیں ہٹانے کے لیے نہیں انسانی لاشیں گرانے کے لیے بنایا گیا تھا۔

باقر نجفی رپورٹ نے شہباز شریف اور رانا ثناءاللہ کو مجرم ثابت کیا ہے۔

نیوز کانفرنس میں آصف علی زرداری نے کہا کہ اب بہت ہو چکا۔ اب شہباز شریف مستعفی ہوں اور عدالت کا سامنا کریں۔ سابق صدر نے کہا کہ وہ طاہر القادری کے ساتھ مل کر لڑیں گے اور سڑکوں پر نکلیں گے۔

شہباز شریف سرنڈر کر کے خود کو قانون کے حوالے کریں۔ اب نواز شریف کے بھائی شہباز شریف کو بھی جانا ہوگا۔ بس بہت ہو چکا ۔ شہباز شریف مستعفی ہوں عدالت کا سامنا کریں ان کے خلاف سڑکوں پر نکلیں گے۔

آصف علی زرداری نے کہا کہ وہ سانحه ماڈل ٹاؤن میں ڈاکٹر طاہر القادری کا ساتھ دینا اپنا فرض سمجھتے ہیں۔ وہ سانحه ماڈل ٹاؤن پر آنکھیں بند نہیں کر سکتے۔ یہ معاملہ قومی اسمبلی اور سینٹ میں اٹھائیں گے۔

سابق صدر نے کہا کہ موجودہ حالات میں تیسری قوت آنے کا ارادہ نہیں رکھتی، نہ ہی وہ اسے آنے کی دعوت دے رہے ہیں۔

آصف علی زرداری اور ڈاکٹر طاہرالقادری کی ملاقات پر مسلم لیگ ن کے مرکزی راہنما حمزہ شہباز نے وائس آف امریکہ سے بات کرتے ہوئے کہا کہ ملاقات کرنے میں کوئی حرج نہیں، سیاست دانوں میں رابطے ہوتے رہتے ہیں۔ بس جمہوریت چلتی رہنی چاہیے۔

Leave a Reply

x

Check Also

آج رات آسمان پر روشنیوں کی بارش ہو گی

اگر آپ دنیا کے شمالی حصے میں ہیں تو آپ کے لیے خوش خبری یہ ہے کہ آج یعنی بدھ کی رات کی آپ آسمان پر دم دار ستاروں کے جھرمٹ اور دل لکش روشنیوں کی چمک دمک کا نظارہ کر سکتے ہیں۔ یہ خوبصورت منظر دیکھنے کے لیے آپ کو کسی دور بین کی بھی ضرورت نہیں ہے۔ آپ اپنے کمرے کی کھڑکی سے بھی اس خوبصورت منظر کا لطف اٹھا سکتے ہیں ۔ بس شرط یہ ہے کہ آسمان صاف ہو اور اس پر بادل نہ ہوں۔ یہ خوبصورت منظر ان لوگوں کے لیے ایک شاندار موقع ہے آسمان پر ٹوٹتے ستارے کو دیکھ کر دعا مانگتے ہیں۔ کیونکہ انہیں تقریباً ہر ایک منٹ کے بعد آسمان پر ٹوٹتے ہوئے ستارے نظر آئیں گے اور ان کی چکاچوند آنکھوں کو خیرہ کر دے گی۔ اگر آسمان صاف اور تاریک ہو۔ اردگرد بھی روشنی کم ہو تو کبھی کبھار آسمان سے روشنی کی ایک چمکدار لکیر تیزی سے زمین کی جانب بڑھتی اور اچانک غائب ہوتی ہوئی  نظر آتی ہے ، لیکن ایسا کم  ہی ہوتا ہے کہ روشنیوں کا مینہ برسنا شروع ہو جائے ۔ بدھ کی رات ایک ایسی ہی خاص رات ہے۔ آئرلینڈ کے فلکیاتی ماہرین کی تنظیم نے اپنے ایک بیان میں کہا ہے کہ دم دار ستاروں کی بارش ایک ایسے موقع پر ہو رہی ہے جب آسمان پر چاند بھی نہیں ہوگا اس لیے یہ اس سال کا بہترین نظارہ ہوگا۔ کبھی آپ نے غور کیا کہ یہ دم دار ستارے کیا ہوتے ہیں۔ اور ان میں اتنی روشنی اور چمک کہاں سے آتی ہے اور پھر وہ اچانک نظروں سے اوجھل ہو کر کہا ں چلے جاتے ہیں۔ اس سوال کا جواب بہت دلچسپ ہے۔ سائنس دانوں کا کہنا ہے کہ جنہیں آپ دم دار ستارہ کہتے ہیں، وہ سرے سے ستارا ہوتے ہی نہیں بلکہ وہ شہاب ثاقب ہوتے ہیں ۔ انہیں شہابیئے بھی کہا جاتا ہے۔ شہاب  ثاقت  خلا میں بھٹکتے ہوئے چٹانی ٹکڑے ہیں ۔ یہ ٹکڑے اسی مواد سے بنے ہیں جس سے كائنات کے دوسرے اجرام فلکی بنے ہیں۔ یہ ستاروں کے آپس میں ٹکرانے، یا تباہ ہو جانے کے بعد اپنے مرکز سے بچھڑ کر خلا میں بھٹکنے لگتے ہیں اور جب وہ کسی سیارے کے قریب سے گذرتے ہیں تو اس کی کشش انہیں اپنی جانب کھینچ لیتی ہے۔ ​ سائنس دانوں کا کہنا ہے کہ زمین کے گرد ہوا کا ایک خلاف موجود ہے۔ یہ خلاف زمین پر زندگی کا سب سے بڑا محافظ ہے۔ جب کسی شہاب ثاقب کو زمین کی کشش ثقل اپنی جانب کھینچتی ہے تو ہوا کی  رگڑ سے اس میں آگ لگ جاتی ہے اور وہ زمین پر پہنچنے سے پہلے ہی راکھ کا ڈھیر بن جاتا ہے ۔  اگر وہ تیز رفتار گولہ زمین سے ٹکرا جائے تو ہولناک تباہی لا سکتا ہے۔ جب ہمیں کوئی دم دار ستارہ تیزی سے زمین کی جانب بڑھتا اور غائب ہوتا ہوا نظر آتا ہے تو دراصل اس وقت وہ زمین کے کرہ ہوائی میں جل رہا ہوتا ہے۔ سائنس دانوں کا کہنا ہے کہ شہابیوں کی اشکال مختلف ہوتی ہیں اور ان میں شامل عناصر اور اجزأ بھی اور سائز بھی مختلف ہوتے ہیں۔ جن شہابیوں کا قطر تین میل یا اس سے زیادہ ہو انہیں فلکیات کی زبان میں فائی تھون کہا جاتا ہے۔ امریکی خلائی ادارے ناسا کے ایک سائنس دان بل کک کا کہنا ہے کہ فائی تھون یا تو  کرہ ارض کے قریب خلا میں تیر  رہے ہیں یا وہ  کہکشاں کے کسی حصے سے بھٹکتے ہوئے زمین کے قریب آ جا تے ہیں۔     فلکیاتی ماہرین کے مطابق اس سال لوگوں کو دم دار ستاروں کی چمک دمک دیکھنے کا ایک اور موقع بھی ملے گا۔ آسمان کو روشنیوں سے نہلانے والی آج کی بارش کے تین دن بعد دم دار ستاروں کا ایک اور جھرمٹ زمین کے قریب سے گذرے گا۔ لیکن اس کا زمین سے ان کا فاصلہ تقریباً 64 لاکھ میل ہوگا۔ ماہرین کا کہنا ہے کہ بدھ کی ر ات دم دار ستاروں کی بارش سے زمین کو کوئی خطر ہ نہیں ہے، لیکن وہ یہ بھی کہتے ہیں کہ مستقبل میں ایسا بدقسمت لمحہ آسکتا ہے جب کوئی فائی تھون زمین کے مدار میں داخل ہو جائے اور  میلوں بڑے سائز کی اس چٹان کو  زمین کا کرہ ہوائی اسے پوری طرح جلا نہ پائے ، تو پھر جب جلتا ہوا اور آگ اگلتا ہوا فائی تھون زمین سے ٹکرا ئے گا تو ایک قیامت کا منظر ہوگا اور لاکھوں افراد آناً فاناً ہلاک ہو جائیں گے۔ بدھ کی رات دم دار ستاروں کی بارش کا نظارہ آپ دنیا کے کسی بھی حصے سے دیکھ سکتے ہیں، بس شرط یہ ہے کہ آسمان صاف ہو۔

Powered by Dragonballsuper Youtube Download animeshow